ᲡᲡᲘᲞ Ქ.ᲖᲣᲒᲓᲘᲓᲘᲡ N8 ᲡᲐᲯᲐᲠᲝ ᲡᲙᲝᲚᲐ

ჩვენი ეკოკლუბის ფარგლებში დაწყებითი კლასების მოსწავლეებისთვის გაიმართა საგანმანათლებლო პრეზენტაცია, რომელიც ფუტკრებსა და მათ მნიშვნელობას მიეძღვნა. პრეზენტაციის დროს ბავშვები გაეცნენ ფუტკრების ცხოვრების თავისებურებებს, მათ საცხოვრებელ გარემოს, საქმიანობასა და ბუნებაში არსებულ მნიშვნელოვან როლს. განსაკუთრებული ყურადღება დაეთმო დამტვერვის პროცესს და იმას, თუ რამდენად მნიშვნელოვანია ფუტკრები მცენარეთა გამრავლებისა და ეკოსისტემის შენარჩუნებისთვის. მოსწავლეებთან ერთად განვიხილეთ ის საფრთხეებიც, რომლებიც ფუტკრების არსებობას ემუქრება, მათ შორის გარემოს დაბინძურება, პესტიციდების გამოყენება და ბუნებრივი საარსებო გარემოს შემცირება. ვისაუბრეთ იმაზეც, თუ როგორ შეგვიძლია თითოეულ ჩვენგანს წვლილი შევიტანოთ მათი დაცვის საქმეში. აქტივობის მიზანი იყო ბავშვებში ბიომრავალფეროვნების მნიშვნელობის გააზრება, ფუტკრების მიმართ ინტერესისა და მზრუნველი დამოკიდებულების გაღვივება და ბუნების დაცვის აუცილებლობის შესახებ ცოდნის გაღრმავება. პატარა არსებებსაც კი უდიდესი მნიშვნელობა აქვთ ბუნებაში მათი დაცვა ჩვენი საერთო პასუხისმგებლობაა.

ჩვენი ეკოკლუბის პირველი საგანმანათლებლო აქტივობა ნიკო კეცხოველის ცხოვრებასა და მოღვაწეობას მიეძღვნა. პრეზენტაციის ფარგლებში მოსწავლეები გაეცნენ გამოჩენილი ქართველი ბოტანიკოსის, მეცნიერის, მწერლისა და საზოგადო მოღვაწის ბიოგრაფიას, მის სამეცნიერო საქმიანობასა და ბუნების დაცვის საქმეში შეტანილ წვლილს. აქტივობის მიზანი იყო მოსწავლეებში ნიკო კეცხოველის მემკვიდრეობის გაცნობისა და გარემოსდაცვითი პასუხისმგებლობის გაძლიერება. ბუნების სიყვარული მხოლოდ სიტყვებით არ გამოიხატება ის ჩვენს ყოველდღიურ ქმედებებში უნდა აისახოს. სწორედ ამიტომ, მნიშვნელოვანია, თითოეულმა ჩვენგანმა გააცნობიეროს საკუთარი როლი გარემოს დაცვაში, გაუფრთხილდეს ბუნებრივ რესურსებს და იზრუნოს ეკოლოგიურად ჯანსაღი გარემოს შენარჩუნებაზე. ნიკო კეცხოველის ცხოვრება და მოღვაწეობა კი გვახსენებს, რომ ბუნებისადმი ზრუნვა და მისი შესწავლა საზოგადოების განვითარების მნიშვნელოვანი ნაწილია, რაც მომავალში უფრო გააზრებული და პასუხისმგებლიანი გადაწყვეტილებების მიღებაში დაგვეხმარება.