დასავლეთ საქართველოში მოსულმა დიდმა თოვლმა სტიქიური ხასიათი მიიღო და პრობლემები შექმნა ადგილობრივი მოსახლეობისთვის. ზოგიერთი რეგიონის სკოლებში შეწყდა სასწავლო-საგანმანათლებლო პროცესიც. საქართველო მთიანი ქვეყანაა და დიდთოვლობა განსაკუთრებული სიურპრიზი არ უნდა იყოს, თუმცა, სამწუხაროდ, ამინდის მკვეთრი გაუარესება, მით უმეტეს, ანომალიური მეტეოროლოგიური მოვლენები, ხშირად პრობლემებს უქმნის კრიტიკულ ინფრასტრუქტურას და საფრთხის შემცველია ადამიანისათვის. ორგანიზაცია CENN ნიკო კეცხოველის სახელობის სასკოლო კონკურსის მონაწილე სკოლებს გთავაზობთ ერთგვარ სახელმძღვანელოს/გზამკვლევს იმასთან დაკავშირებით, თუ როგორ უნდა მოვიქცეთ დიდთოვლობის დროს და რა უნდა გაკეთდეს სტიქიამდე, სტიქიის დროს და სტიქიის შემდეგ სახლის პირობებში. ჩვენი კონკურსის მონაწილე ეკოკლუბებს ვთხოვთ, ეს ინფორმაცია გაავრცელონ მათ ქალაქებში თუ სასოფლო თემში, ჩაატარონ ამ თემაზე შეხვედრები, რათა უკეთ მოხდეს მოსახლეობის ინფორმირება. თითოეული ასეთი შეხვედრა საკონკურსო ნერგებით იქნება შეფასებული.
