28 მარტს როსტომ აბრამიშვილის სახელობის საჩხერის მუნიციპალიტეტის სოფელ სარეკის საჯარო სკოლის ეკოკლუბელები ხელმძღვანელ მასწავლებლებთან და კვერეთის აღკვეთილის ადმინისტრაციის წარმომადგენლებთან ერთად იმყოფებოდნენ კვერეთის მდინარის წითელწინწკლებიანი კალმახთსაშენში. აქ წარმოებს წითელ წიგნში შეტანილი თევზის სახეობის - ნაკადულის წითელწინწკლებიანი კალმახის მოშენება.
სარეკის სკოლას 2019 წელს ამ საწარმოსთან გაფორმებული აქვს მემორანდუმი. მოსწავლეები რეგულარულად სტუმრობენ აღნიშნულ საწარმოს და ეხმარებიან მეთევზეებს. მარტის თვეში დაგეგმილი იყო ლიფსიტების გაშვება მდინარე ჩიხურაში. აქედან გამომდინარე ეკოკლუბელი მოსწავლეები დიდი სიხარულით ეწვივნენ კალმახსაშენს.
კალმახსაშენში მომუშავე პერსონალმა მოსწავლეებს აუხსნეს თუ როგორ წარმოებს ხელოვნურად თევზის განაყოფიერება და ლიფსიტების გაზრდა კონტეინერებში. შემდეგ მდინარე ჩიხურას სანაპიროდან მოსწავლეებმა რეინჯერების დახმარებით ლიფსიტები გაუშვეს წყალში.