2025 წლის 21 მაისს ქალაქ აბაშაში გაიმართა ღონისძიება დაუნის სინდრომის მქონე პირების მხარდასაჭერად. ღონისძიებას დაესწრო და აქტიურად მონაწილეობა მიიღო აბაშის პირველი საჯარო სკოლის მე-8, მე-9 და მე-11 კლასების მოსწავლეებმა ბიოლოგიის მასწავლებელთან ერთად, ასევე ღონისძიებაში ჩაერთო აბაშის მეორე სკოლაც.
პრეზენტაციის მიზანი იყო საზოგადოების ცნობიერების ამაღლება, ინკლუზიურობის მხარდაჭერა და დაუნის სინდრომის მქონე პირების უფლებებისა და შესაძლებლობების გაცნობიერება. მოსწავლეებმა წარმოადგინეს პრეზენტაციები, ვიდეომასალები და საინფორმაციო ბანერები, სადაც აღწერილი იყო დაუნის სინდრომის მქონე პირების საჭიროებები, შესაძლებლობები და საზოგადოებაში მათი ინტეგრაციის მნიშვნელობა.
ღონისძიების ფარგლებში ჩატარდა დისკუსია, სადაც მოსწავლეებმა გამოთქვეს საკუთარი მოსაზრებები და მოისმინეს სხვა მონაწილეების აზრები. მათ აღნიშნეს, რომ მსგავსი აქტივობები ხელს უწყობს თანასწორობის, ტოლერანტობისა და სოლიდარობის კულტურის ჩამოყალიბებას. ღონისძიებამ დიდი შთაბეჭდილება მოახდინა მონაწილეებზე და მათი თქმით, ამ თემაზე მეტი აქტივობის განხორციელებას ისურვებდნენ.