17 მარტს, ა (ა)იპ წყალტუბოს წმ. გაბრიელ ეპისკოპოსის სახელობის მართლმადიდებლური სკოლა-გიმნაზიის ეკოკლუბმა „ეკოდაივერები“ გამწვანების აქცია მოაწყო, რომლის მიზანი იყო სკოლის ეზოს ეკოსისტემის გაუმჯობესება და გარემოსდაცვითი ცნობიერების ამაღლება. მოსწავლეებმა, მასწავლებლებმა და მოხალისეებმა ერთად დარგეს დაახლოებით 25 ეონიმუსის ნერგი, რაც ხელს შეუწყობს ეზოს გალამაზებას და ჰაერის ხარისხის გაუმჯობესებას.
აქტივობა დაიწყო ნერგების დარგვის ტექნიკის განხილვით. მონაწილეებმა მიიღეს საჭირო ინფორმაცია ნიადაგის მომზადებისა და მოვლის შესახებ. შემდგომ, ჯგუფებად გაყოფილებმა, ნერგები სათითაოდ დარგეს და მორწყეს.
ეს ღონისძიება ეკოდაივერების მიერ მწვანე სკოლის კონცეფციის ფარგლებში განხორციელდა და დაეხმარა მოსწავლეებს გარემოსდაცვითი აქტივობების მნიშვნელობის უკეთ გააზრებაში. აქტივობამ დიდი მოტივაცია გაუჩინა მონაწილეებს, რომლებიც მომავალშიც გეგმავენ სკოლის ეზოს კიდევ უფრო გამწვანებას. დღის ბოლოს, ყველამ ერთობლივად შეაფასა შედეგები და დაასკვნა, რომ მცირე ნაბიჯებიც კი დიდ გავლენას ახდენს გარემოზე.