იმერეთში, ახალთერჯოლის საჯარო სკოლაში უკვე მესამე წელია ფუნქციონირებს ეკოკლუბი ,,Greenway”, რომელიც მრავალ გარემოსდაცვით აქტივობას ახორციელებს ბუნებრივი და სოციალური გარემოს საკეთილდღეოდ. ეკოკლუბელები ცდილობენ თავისი წვლილი შეიტანონ სამყაროს მდგრად განვითარებაში. ბავშვები და მოზარდები დროის დიდ ნაწილს სკოლის გარემოში და  საკლასო ოთახებში ატარებენ.

ეკოკლუბელებს თანატოლებთან ერთად სურთ მათი სასკოლო ცხოვრება წარიმართოს ისეთ გარემოში,  რომელიც მათ მისცემს კარგი განათლების მიღების და ბედნიერი ცხოვრების მოტივაციას. მოსწავლისთვის ფორმალურ განათლებასთან ერთად, მნიშვნელოვანია  არაფორმალური განათლება, რომელიც ხელს უწყობს მათ  კარიერულ წინსვლასა და ინტერესების უკეთ წარმოჩენაში. 

ეკო-კლუბელებმა  საქველმოქმედო აქტივობით მოახერხეს ფინანსების მობილიზება. აქტივობაში ჩართული იყო სასკოლო საზოგადოება, მასწავლებლები, მოსწავლეები და მათი მშობლები. მათ საკუთარი ხელით  მოახდინეს სკოლაში ფიზიკის კაბინეტთან არსებული სივრცის რეაბილიტაცია და ახალი სიცოცხლე შესძინეს მას. სკოლაში მოწვეულმა საპატიო სტუმარმა თერჯოლის საგანმანათლებლო რესურს- ცენტრის ხელმძღვანელმა, ქეთევან შეყრილაძემ და სკოლის დირექტორმა ქალბ. ნინო თოდიძემ საზეიმო ვითარებაში სიმბოლური ლენტის გაჭრით გახსნეს არაფორმარული განათლების ცენტრი, რომელიც ამავე დროს STEM - ის საგნების პოპულარიზაციას მიეძღვნა. 

გახსნის ცერემონიალზე ეკოკლუბელებმა გააკეთეს პრეზენტაცია და მოწვეულ სტუმრებს გააცნეს მათ მიერ განხორციელებული აქტივობები. აქტივობა განხორციელდა კონკურსის ,,ნიკო კეცხოველის სასკოლო პრემია 2025" -ის ფარგლებში. არაფორმალური სივრცის შექმნა გრძელდებოდა რამდენიმე თვე (ნოემბერი - თებერვალი). გახსნის ღონისძიება ჩატარდა 2025 წლის 18 თებერვალს.