ქალთა მიმართ ძალადობის აღმოფხვრისა და გენდერული ძალადობის წინააღმდეგ ბოლნისის კერძო სკოლა „დავითიანში“ მოეწყო სკოლების მოსწავლეების შეხვედრა სახალხო დამცველის აპარატის ქვემო ქართლის ოფისის სპეციალისტებთან. შეხვედრას ესწრებოდნენ ბოლნისის მუნიციპალიტეტის სოფლების ტალავერის, დარბაზის, აკაურთას, მამხუტისა და სკოლა დავითიანის მოსწავლეები და სამოქალაქო განათლების პედაგოგები.
შეხვედრის მთავარი თემა იყო ადრეული ქორწინება. დამსწრეთა დიდ უმრავლესობას აზერბაიჯანელი მოსწავლეები შეადგენდნენ, ამიტომ შეხვედრა ორ ენაზე - ქართულად და აზერბაიჯანულად მიმდინარეობდა.
სახალხო დამცველის აპარატის ქვემო ქართლის ოფისის წევრებმა დამსწრეებს ესაუბრნენ ადრეული ქორწინების უარყოფით გავლენებსა და შედეგებზე, გააცნეს საკანონმდებლო ცვლილებები, განიხილეს ადრეული ქორწინებისა და ოჯახში ძალადობის შემთხვევები. შეხვედრა ინტერაქტიული მეთოდებით წარიმართა, მოსწავლეების მხრიდან დაისვა შეკითხვები, რომლებზეც სახალხო დამცველის ოფისის წარმომადგენლებისაგან მიიღეს ამომწურავი და კომპეტენტური პასუხები.