ყოველწლიურად მსოფლიოში 7-8 მილიონი ხანძრის შემთხვევა ხდება. ტყის ხანძრების მიზეზის საინტერესო ვერსია მეცნიერებს ჩრდილოეთ ავსტრალიის აბორიგენთა ტომებმა მიაწოდეს…
ჩრდილოეთ ავსტრალიის აბორიგენთა ტომებმა ტყის ხანძრის გამომწვევ მიზეზებზე მომუშავე მეცნიერთა ჯგუფს საინტერესო ვერსია შესთავაზეს. ამ ვერსიის თანახმად, ხანძრის გაჩენის ერთ-ერთი მიზეზი ფრინველია, რადგან ხანძრის კერებთან ხშირად შეუნიშნავთ მტაცებელი ფრინველები (ქორი, მიმინო).
აბორიგენების მტკიცებით, სოროებში საიმედოდ დამალული მღრღნელების გამოტყუების მიზნით ფრინველები აალებულ ხის ტოტს ხმელ ბალახებსა თუ ბუჩქნარში აგდებენ.„თავად დავინახე, რომ ქორს კლანჭებში აბოლებული ტოტი ეჭირა და ხმელი ბუჩქნარისკენ მიჰქონდა. ცეცხლის გამჩაღებელმა ტოტი ბუჩქებში ჩააგდო, შორიახლოს ჩამოჯდა და დაელოდა, სანამ შეშინებული მღრღნელები სოროებიდან გამოძვრებოდნენ“.
ტყის ხანძრების თემაზე მომუშავე მკვლევარმა მარკ ბონტმა განაცხადა, რომ ზოგიერთი მტაცებელი ცეცხლის გასაჩაღებლად ადამიანის მიერ დატოვებული კოცონის ნაკვერჩხალსაც იყენებს. ამ ვერსიის დასადასტურებლად, ბონტსა და მის გუნდს გარკვეული პერიოდის მანძილზე ავსტრალიელ აბორიგენებთან ერთად ცხოვრება მოუწიათ.
„ჩვენი კვლევის ერთ-ერთი ყველაზე მნიშვნელოვანი ნაწილია ადგილობრივ აბორიგენებთან მჭიდრო თანამშრომლობა. ეს ადამიანები 50 000 წელია ამ ადგილებში ცხოვრობენ და ბუნების ყველა საიდუმლოს ფლობენ. მათი დახმარებით შევძლებთ „ცეცხლოვანი ფრინველების“ ქცევა შევისწავლოთ. აღსანიშნავია, რომ ადრე ასეთი ექსპერიმენტის ჩატარება ვერავინ მოახერხა“, – ამბობს ბონტი.