ქალაქ ფოთის N4 სკოლის ეკოკლუბ “ერუდიტის“ ინიციატივით 24 მარტს განხორციელდა პროექტი „წყალი და მეცნიერება: გავიგოთ, დავიცვათ, გავუზიაროთ“, რომელიც მიეძღვნა წყლის მსოფლიო დღეს. პროექტის ფარგლებში მოსწავლეებმა მოინახულეს დაცული ტერიტორიის სხვადასხვა ლოკაცია და აიღეს წყლის სინჯები მდინარე კაპარჭადან, მდინარე რიონიდან, პალიასტომისა და ოქროს ტბებიდან. მათ გაზომეს წყლის ტემპერატურა, განიხილეს მისი ფიზიკური და ქიმიური თვისებები, შეისწავლეს წყლის სხვადასხვა მახასიათებელი და ჩაატარეს კვლევითი ექსპერიმენტები.
მოსწავლეებმა პრაქტიკულად შეისწავლეს წყლის გაფილტვრის პროცესი, გამოთვალეს მისი სიმკვრივე და იმსჯელეს კაპილარული მოვლენების მნიშვნელობაზე ბუნებაში. ასევე, მათ შექმნეს შადრევნის მოდელები, რათა დაეხატათ წყლის მოძრაობის პრინციპები და შეესწავლათ ჰიდროდინამიკის საფუძვლები.
კვლევის შედეგები ერთმანეთს გაუზიარეს და იმსჯელეს წყლის დაცვის აუცილებლობაზე. პროექტი ხელს უწყობდა არა მხოლოდ სამეცნიერო კვლევებისადმი ინტერესის გაღრმავებას, არამედ მოსწავლეებში ეკოლოგიური ცნობიერების ამაღლებას და მდგრადი განვითარების პრინციპების უკეთ გააზრებას.
ეკოკლუბელებმა ასევე მოაწყვეს თემატური ნახატების გამოფენა. პროექტის პრეზენტაცია შედგა კოლხეთის ეროვნული პარკის საკონფერენციო დარბაზში. პრეზენტაციაზე მოწვეული იყვნენ საჯარო სკოლის ეკოკლუბის მოსწავლეები.