პროექტის შესახებ

ახალგაზრდული გარემოსდაცვითი კონკურსი - ნიკო კეცხოველის სასკოლო პრემია - 2015 წელს დაარსდა CENN-ის მიერ, პროექტის - ტყის მდგრადი მართვა საქართვველოში ფარგლებში, ავსტრიის თანამშრომლობა განვითარებისათვის / Austrian Development Cooperation   ფინანსური მხარდაჭერით.
კონკურსის თანაორგანიზატორები არიან: საქართველოს განათლების, მეცნიერების, სპორტისა და კულტურის სამინისტრო; საქართველოს გარემოს დაცვისა და სოფლის მეურნეობის სამინისტრო და საქართველოს პარლამენტი
დაარსებიდან დღემდე კონკურსში მონაწილეობა მიიღო 1,000ზე მეტმა სკოლამ.

რა უნდა იცოდეთ, თუ თქვენს სკოლას ჯერ არ უცდია კონკურსში მონაწილეობა

ნიკო კეცხოველის სასკოლო პრემია - არ არის უბრალოდ კონკურსი. ეს უწყვეტი პროცესია ახალი შესაძლებლობების მიღებისა და გაზიარების, პიროვნული ზრდისა და ორგანიზაციული განვითარებისათვის;
ონკურსის მთავარი ფასეულობებია - სოლიდარობა, თანამშრომლობა და პასუხისმგებლიანი დამოკიდებულება გარემოსადმი;
კონკურსის თითოეულ მონაწილეს შესაძლებლობა აქვს, შეიძინოს ცოდნა და უნარ-ჩვევები, რომლებიც აუცილებელია თანამედროვე მსოფლიოში წარმატების მისაღწევად;
კონკურსში მონაწილეობის მთავარი მიზანია პატარა თუ დიდი ცვლილებების შეტანა ბუნებრივი და სოციალური გარემოს გაუმჯობესების საქმეში, მდგრადი განვითარების მიზნების შესაბამისად.

რატომ მდგრადი განვითარების მიზნები ?

მდგრადი განვითარების 17 გლობალური მიზანი თანაბრად გვეხება ყველას. თითოეული ჩვენგანის არჩევანს დიდი ძალა აქვს და მნიშვნელოვანი გავლენის მოხდენა შეუძლია ადგილობრივ და გლობალურ გამოწვევებზე. 

გაიგეთ მეტი მდგრადი განვითარების შესახებ ამ ბმულზე.

კონკურსის კონტექსტი და  წესები 

ყველა ქმედება, რომლებიც, შესაძლებელია განხორციელდეს კონკურსის ფარგლებში ბუნებრივი და სოციალური გარემოს სასიკეთოდ, დაყოფილია კატეგორიებად, და თითოეულის განხორციელებისათვის, ეკოკლუბს  განსაზღვრული ქულა ენიჭება. უფრო ვრცელ ინფორმაციას ნახავთ აქ.

თქვენ სწავლობთ, ასწავლით სხვას, ახორციელებთ გარემოსდაცვით და სოციალურ ღონისძიებებს, ამის დამადასტურებელ ინფორმაციას ტვირთავთ კონკურსის პორტალზე forestry.ge და, ამგვარად, აგროვებთ საკონკურსო ქულებს.

გვჯერა, რომ ნიკო კეცხოველის სასკოლო პრემიის მონაწილეები მომავალი ლიდერები არიან, რომლებიც ხელს შეუწყობენ განვითრებასა და ცვლილებებს უკეთესი გარემოს მისაღწევად.


კონკურსის ფორმატი

ნიკო კეცხოველის სასკოლო პრემია ფარავს საქართველოს ყველა რეგიონს. კონკურსი სამ ეტაპად მიმდინარეობს:

ეტაპი პირველი - ქულების დაგროვება
პორტალზე დარეგისტრირებულ ეკოკლუბებს მათ მიერ განხორციელებული ინიციატივების ხარისხისა და რაოდენობის შესაბამისქულები უგროვდებათ.თითოეული რეგიონის ყველაზე აქტიური და, შესაბამისად, ყველაზე მაღალი ქულების მქონე სკოლები გადადიან ნახევარფინალურ ეტაპზე. 

ეტაპი მეორე - რეგიონული ნახევარფინალები
რეგიონულ ნახევარფინალებზე სკოლებს შესაძლებლობა ეძლევათ, საზოგადოებრივი სექტორისა და გარემოს დაცვის სფეროს ექსპერტებს (კონკურსის თანაორგანიზატორი სახელმწიფო უწყებები და პარტნიორები WWF, National Geographic საქართველო , ასოციაცია სიქა, ევროპის ფონდი, საბუკო, თბილისის ზოოპარკი...) ესაუბრონ გუნდის მუშაობის შედეგებზე, შეძენილ ცოდნასა და მიღწეულ ცვლილებებზე. ჟიური არა მხოლოდ აფასებს სკოლის ეკოკლუბის წარმომადგენლებს, არამედ ესაუბრება და რჩევებს აძლევს მათ, რაც მოსწავლეებისათვის ფასეული გამოცდილებაა.

ეტაპი მესამე - ფინალი
ნახევარფინალის საუკეთესო შედეგების მქონე სკოლები გადადიან ფინალურ ეტაპზე. 
კონკურსის ფინალი,  გარემოს დაცვის  საერთაშორისო დღეს,  5 ივნისს გაიმართება.   

ქულების დაგროვების პროცესი: 15 მაისი, 2019  22 აპრილი, 2020

რეგიონული ნახევარფინალები: აპრილი - მაისი, 2020

ფინალი: 5 ივნისი, 2020, გარემოს დაცვის საერთაშორისო დღე   

კითხვები შეგიძლიათ მოგვწეროთ კონკურსის ოფიციალური ფეისბუქ ჯგუფში - ნიკო კეცხოველის სასკოლო პრემიის მონაწილეები 

ქვემოთ ჩამოთვლილია 10 მიზეზი, რის გამოც კონკურსში უნდა მიიღო მონაწილეობა :

1. წარმოაჩინე საკუთარი თავი!
მიზანმიმართული  ადამიანი ყოველთვის ცდილობს საკუთარი ცოდნისა და უნარების გაუმჯობესებას, აქვს ბევრი იდეა და გამოირჩევა ინდივიდუალიზმით. ნიკო კეცხოველის სასკოლო პრემია მოსწავლეებსა და მასწავლებლებს აძლევს საკუთარი ნიჭისა და უნარების გამოვლენისა და მნიშვნელოვანი დადებითი ცვლილებების განხორციელების შესაძლებლობას.

2. განვითარდი!
ნიკო კეცხოველის სასკოლო პრემიის მთავარ იდეას განათლება და პიროვნული ზრდა წარმოადგენს. პრემიის მიზანია, ხელი შეუწყოს მოზარდების ცნობიერების ამაღლებას და განვითარებას სხვადასხვა მიმართულებით, როგორც სკოლაში, ასევე მის ფარგლებს გარეთ.

3. იზრუნე საკუთარ სოფელზე/ქალაქზე/ქვეყანაზე!
საკუთარ გარემოზე ზრუნვა არის პირველი ნაბიჯი უფრო მნიშვნელოვანი ცვლილებებისკენ და უფრო დიდ ასპარეზზე გასასვლელად.  ნიკო კეცხოველის  სასკოლო პრემია ხელს უწყობს მოსწავლეების საკუთარ გარემოში განვითარებას და აძლევს მათ შესაძლებლობას, მიაღწიონ უფრო დიდ წარმატებას და აღიარებას საერთაშორისო საზოგადოების მხრიდან.

4. მოიპოვე პრიზები!
 ყველა მოსწავლესა და მასწავლებელს ეძლევა პრიზების მოპოვებისა და წარმოუდგენელი გამოცდილების მიღების შესაძლებლობა. 2018 წელს მოსწავლეებმა და მასწავლებლებმა  სპეციალური სასწავლო კურსი სლოვენიასა და ავსტრიაში გაიარეს; 2017 წელს გამარჯვებულ სკოლებში მოეწყო ეკო-ჰაბები - სივრცეები, სადაც მოსწავლეებს ეძლევათ უკეთეს და ჯანსაღ გარემოში მუშაობის შესაძლებლობა.
სკოლებს პრიზებსა და საჩუქრებს ბევრი ორგანიზაცია აძლევს, მაგრამ ნიკო კეცხოველის პრემიის მოსაპოვებლად სასკოლო კონკურსში მონაწილეობა უკვე ნიშნავს იმას, რომ შენ გამარჯვებული ხარ!

5. დაისვენე  ეკობანაკში!
ნიკო კეცხოველის პრემიის ერთ-ერთ ყველაზე მიმზიდველ ნაწილს მისი ბანაკები წარმოადგენს. მოსწავლეები თავს იყრიან ბანაკებში, იძენენ ახალ მეგობრებს და საინტერესოდ ატარებენ მწვანე გარემოში. ისინი ესწრებინ საინფორმაციო და სასაწავლო კურსებს, დადიან ექსკურსიებზე და თამაშობენ სხვადასხვა თამაშებს. ბანაკი არის ახალი ადამიანების გაცნობს, კონტაქტების დამყარებისა და პრობლემების გადაჭრის გზების ერთად პოვნის საუკეთესო შესაძლებლობა.

6. გახდი თანამედროვე პროცესების ნაწილი!
საზოგადოებასა და მსოფლიოში მიმდინარე პროცესების ცოდნა ძალიან მნიშვნელოვანია და გვეხმარება დადებითი ცვლილებების განხორციელებაში. არ იცხოვრო წარსულში - გაიგე, რა ხდება შენს გარშემო და იფიქრე, რა შეგიძლია გააკეთო მომავლის გასაუმჯობესებლად.

7. შეხვდი ქალაქის მერს, პარლამენტის წევრებს, მინისტრებს და სხვადასხვა ორგანიზაციებს!
ნიკო კეცხოველის პრემიის მხარდამჭერია საქართველოს პარლამენტი, გარემოსდაცვისა და განათლების სამინისტროები. მოსწავლეებს ეძლევათ შესაძლებლობა, საკუთარი პროექტები განიხილონ ქალაქის მერთან, პარლამენტის წევრებსა და მინისტრებთან. საკუთარ იდეებზე საუბრის დროს შეგიძლია დაამყარო კონტაქტი იმ ადამიანებთან, რომლებთანაც პროექტების განხორციელებას შეძლებ. ამ გზით საკუთარ იდეებს მთელ მსოფლიოს გააცნობ!

8. გამოავლინე შენი სოციალური პასუხისმგებლობა!
გქონდეს სოციალური პასუხისმგებლობა ნიშნავს, იყო კეთილი, ზრუნავდე სხვა ადამიანებსა და გარემომცველ სამყაროზე, გინდოდეს განვითარება და ცდილობდე გაუმჯობესებას. მოსწავლეებს უნდა ჰქონდეთ სოციალური პასუხისმგებლობა და უნდა შეეძლოთ საკუთარი თავის წარმოჩენა.  ნიკო კეცხოველის სასკოლო კონკურსის მონაწილე მოსწავლეები სამყაროს და საზოგადოებას კრიტიკულად და განსხვავებულად განიხილავენ, ისევე, როგორც ამას მათი ევროპელი და ამერიკელი თანატოლები აკეთებენ.

9. გახდი ლიდერი!
იმისათვის, რომ ნამდვილი ლიდერი გახდე, ბევრი უნდა იშრომო. ნიკო კეცხოველის სასკოლო კონკურსის მონაწილე მოსწავლეებმა და მასწავლებლებმა ბევრი იმუშავესს, იფიქრეს და ისწავლეს იმისათვის, რომ ლიდერები გამხდარიყვნენ. გამოიყენე შენი ნიჭი და იდეები რომ სამყარო უკეთესობისაკენ შეცვალო

10. დაიცავი გარემო!
ნიკო კეცხოველის  სახელობის პრემიის ძირითად თემას გარემოს დაცვა წარმოადგენს. ბევრი ღონისძიება, რომელიც სკოლებს დამატებით ქულებს სძენს, გარემოს დაცვასთან არის დაკავშირებული. გამოიკვლიე, აღმოაჩინე, შეისწავლე, ასწავლე, შეცვალე და დაიცავი საკუთარი გარემო. ნიკო კეცხოველის  სახელობის პრემია მოსწავლეებს აძლევს შესაძლებლობას, გახდნენ საოცარი ღონისძიების ნაწილი, აისრულონ ოცნებები და განახორციელონ იდეები!